گھگھ کے نوجوان کی خودکشی کا معمہ حل ہوگیا

چکوال(ساجد بلوچ) گھگھ کے نوجوان کی خودکشی کا معمہ حل ہوگیا، مرضی سے شادی نہ ہونے پر درخت سے جھول گیا،وقار ولد عمر حیات ساکن گھگھ کاتعلق زمیندارگھرانے سے تھا اور اس کی عمر 26سال بتائی جاتی ہے، وقار کا والد فوت ہوچکا ہے، اپنے بھائیوں میں وقار سب سے چھوٹا ہے اور یہ 9بھائی اور 2بہنیں ہیں، وقار کی 25دن پہلے اپنی کزن سے شادی ہوئی تھی مگر وقار شادی سے خوش نہ تھا، وقار اپنے گھر والوں کی مرضی سے شادی نہیں کرنا چاہتاتھا اور دلبرداشتہ ہوگیا، جس پر چار روز قبل اچانک اپنے ڈیرہ سے لاپتہ ہوگیا۔ اس سے قبل وقارکے بارے میں گمشدگی کی خبر شائع ہوئی تھی جس کے ساتھ دوفون نمبرزبھی اطلاع کے لئے درج کروائے گئے۔ جاتے ہوئے اپنا پرس اور موبائل فون ڈیرہ پر ہی چھوڑ گیا، وقار کو عزیز واقارب ڈھونڈتے رہے اور گزشتہ روز اس کی نعش ایک درخت سے جھولتی ہوئی پائی گئی۔ معلوم ہواہے کہ وقار نے جن درختوں سے لٹک کرخود کشی کی تھی وہ ایسی جگہ تھی جو اوجھل تھی،وقار کی نعش کودیکھ کر تفتیشی اداروں نے نتیجہ اخذ کیاہے کہ اس کی نعش تین روز پرانی ہے اور اس کی موت خود کشی کرنے سے ہی ہوئی ہے۔