رضا کار فورس کا کردار

تحریر: ڈاکٹر زاہد عباس چوہدری  رضا کار فورس پورے پاکستان میں ایک ایسی فورس ہے جسے ہر جگہ استعمال کیا جاتا ہے پنجاب میں لاکھوں رضا کار اپنی جان کی پروا نہ کرتے ہوئے ہر مشکل وقت میں انتظامیہ اور سیکیورٹی اداروں کے ساتھ کھڑے ہوتے ہیں اور اسی طرح چکوال کی تمام تحصیلوں میں اس فورس کے جوان ملک و ملت کی خدمت کے لیے ہمہ وقت تیار رہتے ہیں,  چکوال کے کسی بھی علاقے میں مجلس عزا کی کوئی تقریب ہو,  محفل نعت ہو  دیگر کوئی مذہبی تقریب ہو یا کسی بھی طرح کے ہنگامی حالات اس فورس کے جوان تمام سیکیورٹی اداروں کے جوانوں سے کسی طرح بھی خدمات میں کم نہیں پائے گئے,  کورونا وائرس کے حوالے سے موجودہ مشکل ترین حالات اور صورت حال میں بھی رضا کار فورس کے جوانوں کی خدمات نا قابل فراموش ہیں,  ضلع کے تمام انٹری پوائنٹس پر ناکہ بندی ہو یا کسی چوک اور دیگر جگہوں پر ڈیوٹی یہ فورس کسی سے کم نہیں ہے,  مجھے حیرانگی ہوتی ہے کہ اس قدر کارآمد فورس کے لیے تمام ماضی کی حکومتوں سمیت آج تک کسی نے بھی نہیں سوچا اور رضا کار فورس کے ایک جوان کی تنخواہ دو ہزار روپے ماہانہ ہے,  میرا ارباب اختیار سے سوال ہے کہ مہنگائی کے اس دور میں دو ہزار روپے ماہانہ میں گزارہ ممکن ہے ؟ اور یہ دو ہزار بھی چھ چھ ماہ بعد ملتا ہے جس سے رضا کار فورس کے جوان مجبور ہو جاتے ہیں کہ اس فورس میں رہتے ہوئے دیگر محنت مزدوری بھی کریں.  اور کورونا وائرس جیسی وبا کے موقع پر مشکل ترین وقت اور لاک ڈاؤن میں جہاں عام مزدور طبقہ اور دیہاڑی دار بری طرح سے متاثر ہوئے ہیں اور حکومت ان کی امداد کر رہی ہے وہاں عرصہ دراز سے متاثر شدہ اس طبقے کو ہم کیوں بھول بیٹھے ہیں ؟ ضرورت اس امر کی ہے کہ حکومت وقت فوری طور پر صورت حال کا نوٹس لے اور رضا کار فورس کے جوانوں کی نہ صرف تنخواہیں بڑھائی جائیں بلکہ دیگر فورسسز کی طرح انہیں خصوصی مراعات دی جائیں اور مخیر حضرات بھی اس طبقے کا خیال کریں جو اتنی محنت کے بعد بھی انتہائی کٹھن ترین حالات سے گزر رہا ہے.